បេឡារូស៖ ​ស្ទើរតែមិនគួរឱ្យជឿសោះថា  ប្រធានាធិបតីប្រទេសបេឡារូស (Belarus) ​បែរជាបានណែនាំប្រជាជនខ្លួនឯងថា ​គួរតែទទួលទានស្រា ​Vodka  ជាប្រចាំទៅវិញ ​ដើម្បីប្រឆាំងនឹងវីរុសរាលដាល ​Covid-19  នេះបើតាមរយៈសារព័ត៌មានអន្តរជាតិ​ CNBC  ។

លោក Alexander Lukashenko ដែលជាប្រធានាធិបតីនៃប្រទេសបេឡារូស បាន​ថ្លែង​បែប​នេះ​ បន្ទាប់​ពី​បាន​ទស្សនា​ការ​ប្រកួត​វាយ​កូន​បាល់​លើ​ទឹក​កក​រួច កាលពី​ថ្ងៃទី ​29 ខែ មីនា ដោយលោកបាននិយាយបន្តថាប្រជាជនទាំងអស់គួរតែទទួលទាន ​ស្រា ​Vodka  ឱ្យបាន ​40​ទៅ 50​មីល្លីលីត្រ ជារៀងរាល់ថ្ងៃ  លើកលែងតែពេលធ្វើការ ​ជាពិសេសត្រូវតែទៅកន្លែងសូណាឱ្យបានយ៉ាងហោច ​២ដងក្នុងមួយសប្តាហ៍ នឹងធ្វើឱ្យគ្រប់គ្នាមានសុខភាពល្អ  ថែមទាំងអាចប្រឆាំងនឹងវីរុស ​Covid-19  ផងដែរ។

ក្រោយពីបានស្តាប់ការថ្លែងពីប្រធានាធិបតីរូបនេះរួចមក  មានប្រជាជនជាច្រើនមានការពេញចិត្តឡើយចំពោះការណែនាំបែបនេះ​ ជាពិសេសប្រធានាធិបតីរូបនេះក៏ទទួលបានការរិះគន់ និងការមិនពេញចិត្តមិនឈប់មិនឈរផងដែរ ​ចំពោះសកម្មភាពក្នុងការប្រឆាំងនឹងវីរុស ​Covid-19  នេះក្នុងប្រទេសរបស់ខ្លួន។

នៅក្នុងប្រទេសបេឡារូស ដែល​ជាប្រទេសស្ថិតនៅក្នុងតំបន់​អឺរ៉ុប​ខាង​ត្បូង​មួយ​នេះមានប្រជាជនប្រមាណជា  ៩,៥លាននាក់ ​ត្រូវបានគេដឹងថាព្រំដែនមិនមានការបិទ ​ឬរឹតបន្តឹងនោះទេ ​ឯប្រជាជនក្នុងប្រទេសក៏ត្រូវបានប្រធានាធិបតីនេះបង្ខំឱ្យបំពេញកិច្ចការជាធម្មតា ​ដោយលោកបានថ្លែងថា ​ពិភពលោកហាក់កំពុងតែឆ្កួតលីលា និងស្លប់ស្លោរណាស់ចំពោះវីរុស ​Covid-19 នេះ ។

គួរឱ្យដឹងផងដែរថា  ប្រទេសបេឡារូស ​មានករណីអ្នកដែលឆ្លងវីរុស ​Covid-19  ចំនួន ១៥២ នាក់ហើយ  ជាពិសេសនោះ នៅ​ក្នុង​ប្រទេស​នៅ​តំបន់​អឺរ៉ុប​ខាង​ត្បូង​មួយ​នេះ ហាង​ទាំង​ឡាយ រួម​នឹង​ផ្សារ​ជា​ដើម ក៏នៅ​មាន​សកម្ម​ភាព​ធម្មតា​ រួមទាំងកន្លែង​ប្រគំ​តន្ត្រី​ក៏​នៅ​តែ​បើក​ដំណើរ​ការ​ និងការប្រកួតនានានៅក្នុង​កីឡដ្ឋានផងដែរ៕

ប្រភព៖ ​CNBC