អត់រៀងមែនហ្មង! អគ្គីនេត្រ ត្រូវបានស្នងការដ្ឋាននគរបាលរាជធានីភ្នំពេញអញ្ជើញចូលប៉ុស្តិ៍ម្តងទៀតហើយ ពីបទផ្សព្វផ្សាយយ័ន្តការពារ Covid-19 បាន១០០%
ហាក់ព្រហើននឹងការប្រកាសរបស់ក្រសួងសុខាភិបាលទៅនឹងដំណឹងបំភ្លើសផ្សេងៗទាក់ទងនឹងវីរុស Covid-19 ដែលមិនទាន់មានប្រទេសណាមួយហ៊ានប្រាកដថាមានវិធីការពារ និងព្យាបាលនៅឡើយ លោកគ្រូអគ្គីនេត្រ ល្បីខាងអូមអាមមន្តអាគម ស្រាប់តែបានបង្ហោះសារលក់ជែលលាងដៃ និងយ័ន្តការពារដែលធានាថាអាចការពារ Covid-19 បាន ១០០% ធ្វើឱ្យរងប្រតិកម្មខ្លាំង។
ដើម្បីកុំឱ្យគ្រូមន្តអាគមមួយរូបនេះ នៅតែដើរបំភ្លៃខុសការពិតដើម្បីមុខរបររកស៊ី នៅព្រឹកថ្ងៃទី ២ ខែ មេសា ឆ្នាំ ២០២០ នេះសមត្ថកិច្ចជំនាញរបស់ស្នងការដ្ឋាននគរបាលរាជធានីភ្នំពេញ សហការជាមួយ នគរបាលអធិការខណ្ឌទួលគោក បានហៅលោកគ្រូ អគ្គីនេត មកសាកសួរ ពាក់ព័ន្ធនឹងការផ្សាយធ្វេីយន្តការពារ COvid-19 ហើយ ដោយ ពេលនេះសមត្ថកិច្ចកំពុងសួរចម្លេីយ។
គួរឱ្យដឹងផងដែរថា មកទល់ពេលនេះមិនទាន់មានអ្នកវិទ្យាសាស្រ្តណាមួយអះអាងថា មានវិធី ឬវ៉ាក់សាំងការពារវីរុស Covid-19 នៅឡើយទេ ដោយថ្នាំខ្លះកំពុងតែស្ថិតនៅក្នុងដំណាក់កាលពិសោធន៍ប៉ុណ្ណោះ ដូច្នេះសូមបងប្អូនជនរួមជាតិកម្ពុជាថែរក្សាសុខភាព និងអនាម័យផ្ទាល់ខ្លួនពីវីរុសរាតត្បាតនេះ ដោយឧស្សាហ៍លាងសម្អាតដៃឱ្យបានស្អាតនឹងសាប៊ូ អាល់កុល ឬជែលលាងដៃ ពិសេសពេលចេញទៅខាងក្រៅសូមមេត្តាពាក់ម៉ាស់ការពារឱ្យបានត្រឹមត្រូវ៕
ព័ត៌មានថ្មីៗ
