សោកស្តាយណាស់ រោងល្ខោនសិល្បៈសុវណ្ណភូមិ ដំណើរការអស់ ២៦ឆ្នាំ ពេលនេះប្រកាសបិទទ្វារឆាប់ៗនេះព្រោះអស់លទ្ធភាពទ្រទ្រង់
សមាគមសិល្បៈសុវណ្ណភូមិ ត្រូវបានគេស្គាល់ថា ជាសមាគមថ្នាលបណ្តុះបណ្តាលសិល្បៈបុរាណខ្មែរដល់យុវជនជំនាន់ក្រោយទាំងសិល្បៈស្រមោលស្បែកធំ និងល្ខោនខោល ថែមទាំងមានការសម្តែងជូនសារធារណជនទស្សនាជារៀងរាល់សប្តាហ៍ផងដែរ ដោយសមាគមនេះត្រូវបានគេដឹងថាមានអាយុកាល ២៦ឆ្នាំហើយ ដោយបង្កើតឡើងតាំងពីឆ្នាំ ១៩៩៤ មកម្ល៉េះ។
ដ្បិតតែសមាគមនេះ កន្លងមកមានផលវិបាកច្រើនទាំងទីតាំង ថវិការចូលរួមលើកស្ទួយ ជាពិសេសគឺកម្លាំងលើកទឹកចិត្តការកាំទ្រ តែសមាគមនេះនៅតែបន្តស៊ូឈរអត់ទ្រាំដើម្បីវប្បធម៌សិល្បៈខ្មែរដ៏ល្អថ្លៃថ្លា តែការគាំទ្រពីពលរដ្ឋខ្មែរហាក់បីដូចជាភ្លើងចំបើង ពោលគឺគាំទ្របានតែមួយឆាវ ហើយរួចក៏ស្ងាត់ទៅ ពិសេសក៏មិនទាន់មានក្រសួង ឬអង្គភាពណាមួយចេញមុខមកទ្រទ្រង់ឱ្យសមាគមនេះបានឈរជើងឡើយ។
នៅទីបំផុត សម្រាប់ឆ្នាំ ២០២០ នេះ ដោយសារតែខ្វះថវិកាផង ខ្វះការគាំទ្រផង ពិសេសថែមទាំងជួបវិបត្តិ Covid-19 ផងនោះ ពេលនេះរោងល្ខោនសុវណ្ណភូមិ របស់សមាគមសិល្បៈសុវណ្ណភូមិបានប្រកាសបិទទ្វារហើយ។ ដោយ សមាគមសិល្បៈសុវណ្ណភូមិ បានឱ្យដឹងថា អស់រយៈ២៦ ឆ្នាំហើយ ដោយស្រលាញ់ និងថែរក្សាវប្បធម៌ដូនតា តែឥលូវមិនមានលទ្ធភាពថែបន្តទៀតបានទេ សមាគមសិល្បៈសុវណ្ណភូមិនឹងបិទរោងល្ខោនក្នុងពេលឆាប់ៗនេះ។
នេះពិតជាដំណឹងគួរឱ្យសោកស្តាយបំផុត ដែលយើងបានបាត់បង់ថ្នាលបណ្តុះបណ្តាល និងរោងសិល្បៈបុរាណខ្មែរមួយនេះ តែយ៉ាងណាយើងខ្ញុំសង្ឃឹមថានឹងមានក្រសួង រួមទាំងសប្បុរសជននានា អាចជួយស្រោចស្រង់រោងល្ខោននេះឱ្យមានដង្ហើមបន្តទៅទៀត ដើម្បីជាផ្នែកមួយថែរក្សាមរតកជាតិដ៏ថ្លៃថ្លា៕
ព័ត៌មានថ្មីៗ
