មានទៅអន់អី! ចេកកម្ពុជា កំពុងតែត្រូវប៉ាន់មានទីផ្សារនៅក្នុងប្រទេសជប៉ុន ហើយល្បីថាឆ្ងាញ់ល្មួតល្អទៀត
ប្រទេសកម្ពុជា ត្រូវបានគេទទួលស្គាល់ ថាជាប្រទេសមានទឹកដីមាស ពោលស្ថានភាពដីតំបន់សម្បូរជីវភាពដាំដំណាំបានសឹងតែគ្រប់មុខ ថែមទាំងមានគុណភាព និងឱរសជាតិពិសេសមិនចាញ់ដំណាំ បន្លែ ផ្លែឈើ ប្រទេសជិតខាងឡើយ។
ជារឿយៗកម្ពុជាតែងតែនាំចេញនូវផលិតផលកសិកម្ម ដូចជាស្រូវ អង្ករ និងផ្លែឈើជាច្រើនទៅក្រៅប្រទេស ហើយអ្វីកាន់តែពិសេសពេលនេះសូម្បីតែផ្លែចេកខ្មែរយើងក៏កំពុងតែមានទីផ្សារផងដែរនៅក្នុងប្រទេសជប៉ុន។
តាមរយៈប្រភពព័ត៌មានពី ស្ថានទូតកម្ពុជានៅក្នុងប្រទេសជប៉ុន បានឱ្យដឹងថា៖ « ដំណឹងល្អ! ចេកកម្ពុជាបានបង្ហាញវត្តមាននៅទីផ្សារប្រទេសជប៉ុន។ តាមការជូនដំណឹងខាងផ្សារទំនើបដែលទទួលលក់ចេកកម្ពុជា និងតាមការទិញហូបដោយផ្ទាល់ ចេកកម្ពុជា មានគុណភាព ផ្អែមត្រជាក់ ល្មួតជាទីគាប់ចិត្ត មិនចាញ់ចេកពីប្រទេសដទៃឡើយ។ សូមលើកទឹកចិត្ត ប្រជាជនជប៉ុន បងប្អូនខ្មែរ និង អតិថិជនទូទៅ បន្តគាំទ្រចេក និងផលិតផលផ្លែឈើ ប្រកបដោយគុណភាពពីកម្ពុជា។ »
នេះពិតជាដំណឹងដ៏រីករាយ ហើយក៏ជាការលើកទឹកចិត្តដល់អ្នកធ្វើកសិកម្មដំណាំផ្លែឈើនៅក្នុងប្រទេសកម្ពុជាយើង ឱ្យមានកម្លាំងចិត្តខខិតខំពង្រឹងគុណភាពផលិតផលខ្លួនឯងជាបន្តទៀតដើម្បីមានមុខនៅទីផ្សារក្រៅប្រទេសជាបន្តទៅមុខ៕
ព័ត៌មានថ្មីៗ
