ព្រះនាងតូច នរោត្តម ជេនណា បង្ហើរសូសៀងចម្រៀង « Monica » និពន្ធដោយព្រះមហាវីរក្សត្រ ពិតជាពិរោះរណ្តំខ្លាំង ដើម្បីអបអរពិធីចម្រើនព្រះជន្មសម្តេចម៉ែ (មានវីដេអូ)
ដូចដែលប្រជាជនកម្ពុជាបានដឹងរួចមកហើយថា នៅថ្ងៃទី ១៨ ខែមិថុនា ឆ្នាំ ២០២០ នេះគឺជាព្រះរាជពិធីចម្រើនព្រះជន្មគម្រប់៨៤ យាងចូល ៨៥ ព្រះវស្សារបស់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ហេតុនេះហើយប្រជាជនទូទាំងប្រទេសកម្ពុជា រួមទាំងបណ្តាថ្នាក់ដឹកនាំ និងប្រជាជនទាំងអស់មានសេចក្តីត្រេកអរជាពន់ពេក បានរួមគ្នាក្រាបបង្គំទូលថ្វាយព្រះពរទ្រង់ជាហូរហែរ។
នៅក្នុងនោះ ព្រះនាងតូចនរោត្តមជេនណា ដែលជាសែរាជវង្ស ទ្រង់ក៏បានថ្វាយព្រះពរ សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីសក្ការ:ដ៏ខ្ពង់ខ្ពស់បំផុត ក្នុងឱកាសព្រះរាជពិធីបុណ្យចម្រើនព្រះជន្មរបស់ព្រះអង្គផងដែរ តាមរយៈបទចម្រៀងភាសាបារាំង-អង់គ្លេស មួយបទមានចំណងជើងថា « Monica/ ម៉ូនីកា » ដែលបទចម្រៀងមួយបទនេះ គឺជាបទចម្រៀងដែលព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ បាននិពន្ធឡើងរៀបរាប់ពីប្រវត្តិស្នេហ៍របស់ទ្រង់ និងចង់បង្ហាញពីក្តីស្នេហាស្មោះស្ម័គ្រចំពោះសម្តេចព្រះមហាក្សត្រីផងដែរ។
ដោយនៅលើគណនីហ្វេសប៊ុកផេកជាផ្លូវការរបស់ ព្រះនាងតូច នរោត្តម ជេនណា ដែលបានបង្ហោះវីដេអូចម្រៀង «ម៉ូនីកា» នេះ ទ្រង់ក៏បានថ្លែងសារថ្វាយព្រះពរសម្តេចម៉ែដែរថា៖ « ខ្ញុំម្ចាស់ សូមក្រាបបង្គំទូលថ្វាយព្រះពរ ហ្លូងយាយទួត សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីសក្ការ:ដ៏ខ្ពង់ខ្ពស់បំផុត ក្នុងឱកាស ព្រះរាជពិធីបុណ្យចម្រើនព្រះជន្ម គម្រប់ ៨៤ យាងចូល ៨៥ ព្រះវស្សា របស់ព្រះអង្គ។ សូម ហ្លូងយាយទួត គង់មានព្រះជន្មាយុយឺនយូរ មានព្រះបញ្ញាញាណវាងវៃ និងព្រះរាជសុខភាពមាំមួន ដើម្បីគង់នៅជាម្លប់ដ៏ត្រជាក់ត្រជុំដល់ប្រជានុរាស្រ្តរបស់ព្រះអង្គ » ។
បទចម្រៀង Cover ដែលព្រះនាងតូច នរោត្តម ជេនណា ច្រៀងជាភាសាបរទេស មួយបទនេះ ពិតជាលន្លង់លន្លោច និងពិរោះរណ្តំខ្លាំងមែនទែន ធ្វើឱ្យយើងហាក់នឹករឮក និងអាចពាល់បាននូវសេចក្តីស្នេហាដ៏ជ្រាលជ្រៅរបស់មហាវីរក្សត្រ និងព្រះមហាក្សត្រីតាមរយៈបទចម្រៀងមួយបទនេះទៀតផង។
ដើម្បីជ្រាបច្បាស់ថាសំនៀងព្រះនាងតូច នរោត្តម ជេនណា ក្រអួនក្រអៅប៉ុនណា សូមទស្សនាវីដេអូចម្រៀងខាងក្រោមនេះ ៖
ព័ត៌មានថ្មីៗ
