ប្រជាជនប៉ោយប៉ែតជិត ១០០នាក់ គ្រុនក្តៅខ្លាំងនាំគ្នាភ័យស្លន់ស្លោស្មានតែ កូវីដ តែកំពុងតែពិនិត្យឱ្យប្រាកដថាជាជំងឺគ្រុនមួយនេះសិន
នៅថ្ងៃទី២២ ខែកក្កដា ឆ្នាំ២០២០ នេះ មានអ្នកស្រុកទាំងក្មេងចាស់ជាច្រើននាក់ នៅក្រុងប៉ោយប៉ែត បានធ្លាក់ខ្លួនឈឺ និងឡើងកម្តៅខុសធម្មតា និងចេញកន្ទួលក្រហមនៅលើខ្លួនដោយហេតុការណ៍នេះកើតឡើងនៅក្នុងភូមិក្បាលកោះ ភូមិប៉ោយប៉ែត ភូមិព្រៃគប់ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
តែបើតាមប្រធាននាយកដ្ឋានប្រយុទ្ធនឹងជំងឺឆ្លង បានឱ្យដឹងថា អ្នកជំងឺកំពុងត្រូវបានព្យាបាលនៅក្នុងមន្ទីរពេទ្យ ហើយក្រសួងក៏បានយកសំណាករបស់អ្នកជំងឺទាំងនោះទៅពិនិត្យ ដើម្បីស្វែងរកថាអ្នកជំងឺកើតជំងឺអីឲ្យប្រាកដ។ តែបើតាមរោគសញ្ញាដែលអ្នកជំងឺមាន ខាងក្រុមគ្រូពេទ្យដាក់ការសង្ស័យថា ប្រហែលជាកើត ជំងឺគ្រុនឈីក (Chekungunya) ជំងឺស្អូច ឬកញ្រ្ជិល មិនមែនជាជំងឺ COVID-19 អីនោះទេ។ ដោយជំងឺគ្រុនឈីកមានរោគសញ្ញា ៣ធំៗដូចជា
– គ្រុនក្តៅ ៣-៤ ថ្ងៃ
– ឈឺសន្លាក់ឆ្អឹងជាច្រើនកន្លែង
– មានស្នាមកន្ទួល ឬក្រហមលើស្បែក។
គួរឱ្យដឹងផងដែរថា ជំងឺគ្រុនឈីកនេះមិនមានអីប៉ះពាល់ធ្ងន់ធ្ងរទៅដល់សុខភាពរបស់អ្នកជំងឺទេ វាគ្រាន់តែធ្វើឲ្យអ្នកជំងឺចេញរោគសញ្ញាដូចជា ក្ដៅខ្លួន ចេញកន្ទួលក្រហមនៅលើខ្លួន និងឈឺសន្លាក់ ។ ជំងឺគ្រុនឈីកនេះអាចជាសះស្បើយដោយឯកឯង ដោយគ្រាន់តែផ្ដល់ថ្នាំបំបាត់គ្រុនក្ដៅធម្មតាប៉ុណ្ណោះ៕
ព័ត៌មានថ្មីៗ
