អ្នកនាង ម៉េង កែវពេជ្ជតា សម្រាកមិនលក់ព្រោះហួសចិត្តនឹងព័ត៌មានកាលៃ ធ្វើឱ្យប៉ះពាល់កិត្តិយសលោកជំទាវចិត្តធម៌ ហ៊ុន ស៊ីណាត
កាលពីមួយរយៈមុនអ្នកនាង ម៉េង កែវពេជ្ជតា តារាចម្រៀង បានមានរឿងចម្រាងចម្រុះ និងមានបញ្ហាយល់ច្រលំខ្លះៗ ដែលជាក់ទាក់ទងនឹងលោកជំទាវ ហ៊ុន ស៊ីណាត រហូតមានការប្តឹងប្តល់គ្នាឡើងតុលាការផងដែរ ដោយអ្នកនាង បានទទួលបណ្តឹង និងការចោទប្រកាន់ពីបុគ្គល៣រូប ដែលមានលោកជំទាវចិត្តធម៌ ហ៊ុន ស៊ីណាត មួយរូបផងដែរ។
ក្រោយពីការធ្វើលិខិតសុំទោស និងបានទៅជួបលោកជំទាវ ហ៊ុន ស៊ីណាត ដល់ភូមិគ្រឹះ អ្នកនាង ម៉េង កែវពេជ្ជតា បានធ្វើការ Lives វីដេអូរៀបរាប់ពីបុគ្គលផ្សេងដែលបានដកពាក្យបណ្តឹងពីអ្នកនាង តែបែរជាត្រូវបានបានសារព័ត៌មានមួយចំនួនបានដកស្រង់សម្តីអ្នកនាងចុះលើព័ត៌មានរហូតធ្វើឱ្យលោកជំទាវ ហ៊ុន ស៊ីណាត មានការមិនពេញចិត្តជាខ្លាំង ដែលបណ្តាលមគពីការយល់ច្រលំ នេះបើយោងតាមការរៀបរាប់របស់អ្នកនាង ម៉េង កែវពេជ្ជតា ធ្វើការបកស្រាយ។
ដោយយោងទៅតាមគណនីហ្វេសប៊ុកជាផ្លូវការរបស់អ្នកនាង ម៉េង កែវពេជ្ជតា បានរៀបរាប់ថា៖ «សូមជម្រាបសួរ បងប្អូន និងមិត្ត 💝
យប់មិញខ្ញុំសម្រាកមិនលក់ទេ ព្រោះតែការហួសចិត្តនឹងព័ត៌មានកាលៃពាក្យសម្តីខ្ញុំ ។
អ្វីដែលខ្ញុំនិយាយពីថ្ងៃទី៣.១.២០២១ មិនបានសំដៅលេីលោកជំទាវមីងសោះ ខ្ញុំមានទាំងវីដេអូច្បាស់ៗ គ្រប់គ្នាដែលទស្សនាការឡាយក៏អាចធ្វេីជាសាក្សីបាន ។ ខ្ញុំនិយាយតែពីអ្នកផ្សេង ខ្ញុំក៏មិនបានមានចរិតអំនួតអ្វីដែរ តែពាក្យខ្លះគឺខ្ញុំចង់ផ្ញេីទៅមនុស្សប្រុសម្នាក់ដែលខ្ញុំប្តឹងព្រោះតែចូលមកជេរខ្ញុំក្នុងការឡាយរបស់ខ្ញុំ គឺដេីម្បីចង់ប្រាប់ថាកុំអោយម្នាក់នោះប៉ះពាល់ខ្ញុំទៀតប៉ុណ្ណោះ ។ ប៉ុន្តែព័ត៌មានចុះផ្សាយនិយាយផ្សេងទៅវិញគួរអោយហួសចិត្ត ។ យប់មិញដេីម្បីកុំអោយមានការយល់ច្រលំ នាងខ្ញុំក៏បានចេញមកឡាយបកស្រាយ ថែមទាំងធ្វេីការសូមទោសលោកជំទាវមីងជាច្រេីន ក្រោយពីខ្ញុំទទួលបានដំណឹងភ្លាម ។
ខ្ញុំសូមបញ្ជាក់ជូនម្តងហេីយម្តងទៀតថា ខ្ញុំគ្មានគំនិតអាក្រក់ណាមួយចង់អោយលោកជំទាវមីងអាប់ឱនកិត្តិយសទេ ។ ខ្ញុំបានទទួលការអភ័យពីលោកជំទាវកាលណោះ គឺជាគុណបុណ្យណាស់ទៅហេីយ ដូច្នេះគ្មានប្រយោជន៍អីដែលខ្ញុំត្រូវមកធ្វេីអាក្រក់លេីលោកជំទាវនោះទេ ខ្ញុំក៏ស្រលាញ់គោរពលោកជំទាវរហូតមកដែរ ខ្ញុំគ្មានថ្ងៃធ្វេីបាបចិត្តលោកជំទាវទេ មានតែការពារ គ្រាន់តែគិតបន្តិចក៏យល់ ។
ចំនុចមួយដែលយេីងគួរឆ្ងល់គឺ ខ្ញុំនិយាយឈ្មោះអ្នកផ្សេង តែពេលពត៌មានយកមកផុសបែរជាដាក់រូបលោកជំទាវដែលខ្ញុំមិនបាននិយាយដល់ទៅវិញ ។ សូមបងប្អូនជួយពិចារណាខ្ញុំផង 😕
ជាថ្មីម្តងទៀត ក្មួយសូមធ្វេីការសូមទោសចំពោះលោកជំទាវមីងពីចំងាយ 🙏 ក្មួយក៏សោកស្តាយដែរ ដែលមិនគួរមានព័ត៌មានអុជអាលធ្វេីអោយលោកអាក់អន់ភ័ន្តច្រលំដូច្នេះទេ អោយក្មួយសូមទោសផង 🙏 សូមលោកជំទាវមីងផ្តល់ក្តីអនុគ្រោះដល់ក្មួយដែលកំពុងមានការយាយីពីមនុស្សខូចជុំទិសនេះផង 🙏 ក្មួយសង្ឃឹមលេីទឹកចិត្តមនុស្សធម៌ដែលលោកជំទាវធ្លាប់មានកន្លងមកលេីកលែងអោយក្មួយដោយអនុគ្រោះ ក្មួយសូមអរគុណដោយក្តីគោរព 🙏🙏🙏 សូមអរគុណការបារម្ភពីបងប្អូនគ្រប់គ្នា 🙏»។
យើងខ្ញុំក៏សង្ឃឹមថាបញ្ហារវាង សិល្បការិនីខ្មែរ និងថ្នាក់ដឹកនាំ ដែលបណ្តាលមកពីការយល់ច្រលំមួយនេះនឹងបានដោះស្រាយក្នុងពេលឆាប់ៗនេះ៕
ព័ត៌មានថ្មីៗ
