ស្អែកនេះ ប្រលោមលោក “កូនអុកសម្ងាត់” ដែលអ្នកអានទន្ទឹមរង់ចាំនឹងចេញលក់ហើយ

2022-03-17

ដំណឹងក្តៅៗ មិនឱ្យអ្នកអានរង់ចាំយូរឡើយ បន្ទាប់ពី គ្រឹះស្ថានស្រលាញ់សៀវភៅ បើក Pre-order ឲ្យអ្នកគាំទ្រកម្មង់សៀវភៅថ្មីទុក ដើម្បីទទួលបានតម្លៃពិសេស និងការថែមជូនស្នៀតសៀវភៅចំនួន១។ ចំពោះរយៈពេលរង់ចាំទទួលបានសៀវភៅ គឺត្រឹមតែ២សប្តាហ៍ប៉ុណ្ណោះ។

“កូនអុកសម្ងាត់” នឹងចេញលក់ជាផ្លូវការនៅថ្ងៃទី ១៨ មីនា២០២២ខាងមុខនេះហើយ។ ស្នាដៃដ៏ទាក់ទាញនេះ គឺស្ថិតក្រោមការនិពន្ធដោយ អ្នកនិពន្ធដ៏ស្រស់សោភា២រូប គឺ អ្នកនាង ម៉ូលីនណា និង កញ្ញា រ៉េត សុដាវណ្ណ។ ក្នុងកិច្ចសម្ភាសជាមួយជានឹងគេហទំព័រ “Knongsroktv" អ្នកនិពន្ធស្រីល្បីឈ្មោះ ម៉ូលីនណា បានប្រាប់ឱ្យដឹងថា៖

ចំពោះរឿងកូនអុកសម្ងាត់ ជាប្រភេទរឿងប្រលោមលោកមនោសញ្ចេតនា លាយឡំនឹងអាថ៌កំបាំង។ សាច់រឿងមួយនេះ និយាយពីដំណើរជីវិតរបស់ក្មេងស្រីម្នាក់ ដែលគាត់បានចូលរៀននៅសាលាដ៏ល្បីឈ្មោះមួយ ហើយគាត់គឺជាអ្នកបំបែកអាថ៌កំបាំងដ៏ខ្មៅងងឹតនៅក្នុងសាលាមួយនោះ។ អត្ថន័យសំខាន់ដែលខ្ញុំចង់បង្ហាញនៅក្នុងរឿងនេះ គឺសារៈសំខាន់នៃគ្រួសារ តួយ៉ាងដូចជាតួឯកស្រីនៅក្នុងរឿង គឺគាត់ស្រលាញ់គ្រួសារណាស់ តែគាត់ត្រូវឃ្លាតឆ្ងាយពីគ្រួសារដើម្បីស្វែងរកអនាគត រីឯតួឯកប្រុសវិញ គាត់មានគ្រប់យ៉ាង មានទាំងឪពុកម្ដាយ បងប្អូន តែគាត់បែរជារកមិនឃើញក្ដីសុខ ព្រោះតែគ្រួសារមិនចុះសម្រុងនឹងគ្នា។ សរុបមកវិញ នៅពេលដែលយើងមានគ្រប់យ៉ាង យើងមិនសូវមើលឃើញពីតម្លៃរបស់ដែលនៅជុំវិញខ្លួនទេ រហូតទាល់តែយើងលែងមានវាតទៅទៀត ទើបយើងដឹងពីសារៈសំខាន់របស់វា។ រឿងកូនអុកសម្ងាត់ នឹងនាំអ្នកទាំងអស់គ្នា ចូលទៅពិភពមួយដ៏ថ្មីប្លែក ព្រោះមិនថាជាទីកន្លែង ឈ្មោះតួអង្គ និង ចរិតតួអង្គ គឺយើងច្បិចចេញពីល្បែងរបស់ខ្មែរម្យ៉ាងមានឈ្មោះថា «ចត្រង្គ»។ មិនខុសគ្នាពីអ្នកនិពន្ធ ម៉ូលីនណា ឡើយ ដោយអ្នកនិពន្ធវ័យក្មេង “រ៉េត សុដាវណ្ណ” បានលើកឡើងដូចនេះថា៖

«កូនអុកសម្ងាត់» ជាស្នាដៃថ្មីមួយដែលនាងខ្ញុំនិងបងម៉ូលីនណាខិតខំសម្រិតសម្រាំងយកចិត្តទុកដាក់។ រឿងនេះមិនត្រឹមតែបង្ហាញនូវមនោសញ្ចេតនាជ្រាលជ្រៅរបស់តួអង្គ ទាំងរឿងក្រុមគ្រួសារ ស្នេហា មិត្តភាព និងការតស៊ូតែប៉ុណ្ណោះទេ ប៉ុន្ដែនៅក្នុងសាច់រឿងទាំងមូលពោរពេញទៅដោយអាថ៌កំបាំងជាច្រើន តាមមកដោយភាពនិរាសព្រាត់ប្រាស និងសោកនាដកម្មរាប់មិនអស់។ ដោយឡែកតួអង្គសំខាន់ទាំងបីនៅក្នុងរឿង គឺ អៃដា រ៉ុងឃីន និងហេមន្ដ ក៏មានចរិតលក្ខណៈពិសេសរៀងៗខ្លួន ដែលសុទ្ធតែកើតមកចេញពីប្រវត្តិអាថ៌កំបាំងដ៏ជូរចត់របស់ពួកគេម្នាក់ៗ ធ្វើឲ្យវិធីក្នុងការដោះស្រាយបញ្ហារបស់ពួកគេមានភាពខុសប្លែកគ្នា ដែលធ្វើឲ្យអ្នកអានស្មានមិនដល់។ បន្ថែមពីនេះទៀត កូនអុកសម្ងាត់ក៏បានជ្រើសរើសដាក់រួមបញ្ជូលនូវប្រធានបទអប់រំសំខាន់ៗជាច្រើន និងមានចូលរួមលើកកម្ពស់ឧបករណ៍តន្រ្ដីបុរាណខ្មែរផងដែរ។ ដូចនេះហើយនាងខ្ញុំសង្ឃឹមថាសាច់រឿង និងខ្លឹមសារអប់រំនានានឹងដក់ជាប់នៅក្នុងចិត្តរបស់មិត្តអ្នកអានគ្រប់រូប។

គួររំលឹកផងដែរថា ក្នុងថ្ងៃទី១៨ មីនា កាលពីឆ្នាំកន្លងទៅ អ្នកនិពន្ធទាំងពីររូបនេះ ក៏ធ្លាប់បានចេញផ្សាយរឿង “កុសុនីមាត់ទិព្វ” ដែលជាស្នាដៃនិពន្ធរួមគ្នា។ ហើយរឿងនោះក៏ទទួលបានការគាំទ្រយ៉ាងច្រើនពីអ្នកគាំទ្រ ដូច្នោះសម្រាប់រឿងថ្មីក្រោយនេះ “Knongsroktv" ក៏សូមជូនពរឱ្យអ្នកនិពន្ធទាំងពីរទទួលបាននូវភាពជោគជ័យនិងសេចក្តីស្រលាញ់ពីអ្នកគាំទ្រដូចរឿងមុនៗដែលខ្លួនធ្លាប់ទទួលបាន៕

២២២